Nuk munda të gjej shembuj fjalish të mirëfillta me fjalën "kryeteknik" në rolin e atij që asiston në ndriçime (apo në punë të tjera ndihmëse mekanike (grip)), por përdorimet e mësipërme tregojnë se ka një rol të tillë në këtë fushë.

Duhet patur parasysh se dhe në vende të tjera ekipi i xhirimit jo gjithmonë i përmban të gjitha nivelet e mundshme të teknikëve për ndriçimin, siç janë (sipas rangut) mjeshtri, kryetekniku, teknikët dhe elektricistët - shpeshherë mund të ketë vetëm një kombinim i dy apo tre prej këtyre, varur nga rëndësia dhe buxheti i projektit. Prandaj, dhe tek ne, roli i kryeteknikut mund të zëvendësohet nga, apo edhe të zëvendësojë, një prej të tjerëve.

Desha të vë në dukje se shembulli i dytë i mësipërm është marrë nga faqja zyrtare e filmit shqiptar "GJALLË" (ALIVE). Pavarësisht se nuk janë përkthyer rolet e të gjithë ekipit realizues, ai që mban rolin "best boy", Dragan Adamovic, është i njohur në teknikën e ndriçimit, siç mund të shihet dhe këtu: http://www.imdb.com/name/nm2578057/filmotype.

Fjala mund të përkthehet edhe si kryeasistent apo asistent i parë, por në shqip këto terma përdoren tashmë dendur tek forcat e rendit, si dhe në disa sektorë/detyra të tjera.

Kryetekniku, si pjesë e ekipit të ndriçimit ose mekanikës në xhirime, vjen në rang pas mjeshtrit të ndriçimit. Ky term nuk është i kufizuar vetëm në fushën e xhirimeve, por gjen përdorim dhe në fusha të tjera (me përgjegjësi të tjera).